Baada ya mchezo dhidi ya Express Fc hapo jana ambao Yanga iliondoshwa kwenye michuano ya kombe la Kagame kwa kufungwa mabao 3-1, Afisa Mhamasishaji wa Yanga Antonio Nugaz aliwapongeza vijana kwa kuipambania timu licha ya kupoteza mchezo huo
Aidha Nugaz akawaambia Mashabiki kuwa sasa michuano hiyo imemalizika na wanaelekeza nguvu katika ujenzi wa kikosi chao
"Ninachowaambia wanachama na mashabiki wetu sasa waweke bando, tumalizie huku kwenye usajili kwanza," alisema Nugaz
Leo Yanga huenda ikatambulisha usajili wa nyota mwingine wa kigeni ambaye inaelezwa tayari ametua nchini
Nyota wawili wa kigeni waliokuwa wakizungumzwa sana ni mlinda lango kutoka Mali, Diarra Djigui na kiungo mkabaji Khalid Aucho
Djigui ndiye anatajwa kuwa ndani ya viunga vya Avic Town kumalizana na Wananchi wakati Aucho imeelezwa walishamlizana nae na atakuja nchini wiki ijayo
Mlinda lango Djigui anatokea klabu ya Stade Malien ambao ni mabingwa wa Mali
Kipa huyo, mwenye miaka 26, alikuwa nahodha wa timu ya taifa ya Mali iliyoshiriki fainali za Mataifa ya Afrika kwa wanaocheza kwenye ardhi ya nyumbani (CHAN) 2020
Bilionea wa GSM Ghalib Said Mohamed ilibidi apande dau ili kumshawishi kipa huyo aliyekuwa akiwaniwa na timu moja kutoka Afrika Kusini
Djigui alicheza fainali za Kombe la Dunia la Vijana U-20 (2015) na kuiwezesha Mali kumaliza ya tatu nyuma ya Serbia na Brazil, alikuwa mmoja wa makipa watatu bora katika fainali za CHAN 2020 zilizofanyika nchini Cameroon baada ya kuonyesha kiwango kikubwa hasa kuzuia michomo mikali wakifika fainali na kumaliza wa pili nyuma ya Morocco
Kama Wananchi watamtambulisha mlinda lango huyo, itamaanisha Mkenya Farouk Shikhalo hataongezwa mkataba kuendelea kuitumikia Yanga
