Ali Kiba afunguka Niyonzima kuondoka Yanga, amtakia kila la kheri

Ali Kiba, mkali wa muziki wa kizazi kipya ni shabiki wa kutupwa wa klabu ya Yanga. Mara nyingi Kiba huwa hakosi mechi muhimu za Yanga zinazopigwa kwenye dimba la Taifa.

Kiba na aliyekuwa kiungo wetu fundi Haruna Niyonzima walikuwa marafiki sana. Kama ilivyo kwa Kiba, mara nyingi Niyonzima alikuwa akihudhuria 'show' za mkali huyo wa Bongofleva.

Sasa kuondoka kwa mchezaji huyo Jangwani kimemuumiza sana Kiba kulingana na mahojiano aliyofanya na mtandao wa ShaffihDauda.

“Nimejisikia vibaya kwa sababu mimi ni shabiki wa Yanga namkubali Niyonzima, lakini mpira ni kazi yake unapokuwa unatumikia sehemu kwa muda mrefu inafika kipindi unataka kwenda sehemu nyingine.”

“Kwanza ni historia nzuri kwake kwenye mpira kwamba amecheza klabu fulani na fulani, anatajwa kwenda Simba, ni klabu kubwa vilevile.”

“Nitaendelea kum-support kama mshkaji wangu lakini mimi ni shabiki wa Yanga na sija-mind yeye kutoka Yanga kwa sababu ni moja ya mafanikio kwake ameangalia maslahi na yeye ni mchezaji mpira.”

“Mchezaji mpira anafanana na sisi wanamuziki, tunaangalia panapokuwa na maslahi. Hata leo promota akiniambia ana kiasi hiki halafu mwingine akanipigia simu akaniambia ana zaidi nakwenda kwingine.”

“Vilevile sidhani kama amefanya maamuzi mabaya japokuwa mimi ni mwana Yanga na nilitamani aendelee kubaki Yanga ila ana uhuru.”