Yanga inatumia michuano ya Kagame kujaribu baadhi ya wachezaji wake wapya pamoja na kuwapa muda wa kucheza wachezaji wa timu ya vijana na wale ambao hawakutumika sana katika kikosi cha kwanza
Katika mchezo wa kwanza dhidi ya Nyasa Big Bullets ambao ulimalizika kwa sare ya bao 1-1, kikosi cha Yanga kilikuwa na nyota wawili wapya, Dickson Ambundo na Jimmy Ukonde raia wa Msumbiji aliyetua akitokea klabu ya UD Songo
Pasipo shaka, Ambundo alikuwa nyota wa mchezo kutokana na umahiri wake alioonyesha dimbani
Ni mchezaji ambaye hakuna shaka, ataongeza kitu kwenye safu ya ushambuliaji ya Yanga
Alitua kutoka mkoani Mwanza usiku wa kuamkia jana, akashuka uwanjani pasipo kufanya mazoezi na wachezaji wenzake
Lakini ndiye aliyekuwa mchezaji tishio zaidi mbele ya safu ya ulinzi ya Nyasa Big Bullets
Bao la Yanga lilianzia mguu kwake, akahusika katika mashambulizi mengine matatu ya hatari
Ujio wa Ambundo unakwenda kuimarisha eneo la ushambuliaji kutokea pembeni akiungana na Tuisila Kisinda
Ambundo hajahitaji muda kudhihirisha ni mchezaji ambaye Yanga ilihitaji kuwa nae
