Kocha Razak Siwa amesema Yanga haiendi kushiriki tu michuano ya kombe la Kagame, bali wamedhamiria kutwaa ubingwa wa michuano hiyo
Yanga itashuka uwanjani kesho Jumapili katika mchezo wake wa kwanza dhidi ya Nyasa Big Bullets utakaopigwa uwanja wa Benjamin Mkapa kuanzia saa moja usiku
Siwa amekabidhiwa majukumu ya kuiongoza Yanga katika michuano hiyo inayofanyika Tanzania
Kocha huyo wa makipa katika kikosi cha Yanga, amesema hawafahamu vizuri Nyasa Big Bullets lakini wamejipanga kwa ajili ya kuwakabili na kuhakikisha wanashinda mchezo wao wa ufunguzi wa michuano hiyo
"Sina takwimu zao vizuri, lakini cha msingi ni kuingia kwenye michuano kwa malengo. Na sisi lengo la ushiriki ni kutwaa ubingwa, hivyo tuna kila sababu ya kuingia kwa tahadhari zote ili tupate ushindi," alisema Siwa
Kikosi cha Yanga kiliingia kambini jana kujiandaa na michuano hiyo, kikiundwa na wachezaji wazoefu na wale wa kikosi cha vijana
