Maboresho ya safu ya ushambuliaji kwenye kikosi cha Yanga sio jambo lenye mjadala kwani ni eneo lililowakosesha furaha Wananchi msimu huu
Yacouba Songne ndiye kinara wa mabao akiwa amefunga mabao 10 katika mashindano yote
Pamoja na kuwa sio takwimu za kujivunia sana, lakini angalau Wananchi wameielewa kazi yake uwanjani
Michael Sarpong ameshindwa kuonyesha makali yake akimaliza msimu na mabao manne
Ni hivyo hivyo kwa Fiston Abdulrazak aliyetua kwenye usajili wa dirisha dogo, ameondoka akiwa amefunga mabao mawili
Ni wazi Yanga inahitaji kusajili washambuliaji mahiri zaidi ambao wataleta matokeo chanya uwanjani
Mpaka sasa ni tetesi tu zinazovuma, Mkurugenzi wa Uwekezaji GSM injinia Hersi Said akiwahakikishia Wananchi kuwa wanaleta watu hasa wa kazi ambao watazichakaza nyavu za wapinzani
Washambuliaji hawa watatu wanatajwa zaidi, pengine mmoja kati yao au wawili wanaweza kuongoza safu ya Yanga msimu ujao
Heritier Makambo
Heritier Makambo sio mgeni kwa Wanayanga. Bado anaendelea kukumbukwa kwa kazi nzuri aliyofanya msimu wa 2018-19
Yanga ilimuuza Horoya Ac miaka miwili iliyopita, akiwa ametumika kwa msimu mmoja tu
Katika msimu huo, Makambo aliweza kufunga mabao 22 katika mashindano yote
Hakuwa na wakati mzuri sana katika klabu ya Horoya, lakini Wananchi wanaamini akirejea, makali ya safu ya ushambuliaji yatarudi kwani tayari anaifahamu ligi ya Tanzania
Katika moja ya mahojiano, Injinia Hersi alisema wanatambua Wananchi wanamtaka kwelikweli Makambo lakini bado ana mkataba wa mwaka mmoja na Horoya hivyo wasubiri kuona kama itawezekana kumpata
Fiston Mayele
Mayele ni mshambuliaji wa AS Vita, kule ambako juzi tu Yanga imekamilisha usajili wa aliyekuwa nahodha wa timu hiyo Shabani Djuma
Mayele alishika nafasi ya pili katika mbio za ufungaji bora ligi kuu ya DR Congo msimu uliomalizika akiweka kambani mabao 13
Anacheza timu ya Taifa ya DR Congo na hata walipokuja Tanzania kucheza mechi ya kirafiki hivi karibuni, ni yeye aliyefunga bao la DR Congo katika mchezo huo uliomalizika kwa matokeo ya sare ya bao 1-1
Jean Makusu Mundele
Ni mchezaji mwingine wa AS Vita ambaye msimu uliomalizika aliitumikia Orlando Pirates kwa mkopo
Msimu wa 2018-19, Makusu aliifungia AS Vita mabao 44 katika mashindano yote na haikushangaza kwake kupata nafasi kusajiliwa na Pirates
Pia amewahi kucheza Ligi Kuu ya Ubelgiji klabu ya Standard Liege. Makusu yuko nchini na Inaelezwa aliletwa na Simba lakini mwenyewe ametamani zaidi kujiunga na Yanga ambako tayari wapo wachezaji Wacongoman wenzake aliokuwa nao AS Vita ambao ni Mukoko Tonombe, Tuisila Kisinda na Shabni Djuma akiwa njiani kujiunga nao
Aidha majeraha aliyopata msimu uliopita yalimuathiri kwa kiasi na pengine ndio maana hakun'gara Orlando Pirates ambayo awali ilimchukua kwa mkopo ikiwa na lengo la kumsajili moja kwa moja
Hata hivyo usajili wa yeyote utategemea na mapendekezo ya kocha Nasreddine Nabi ambaye ndiye mwenye kauli ya mwisho
