Kikosi cha Yanga kitakamilisha ratiba ya ligi kuu Julai 18 mkoani Dodoma kwa mchezo dhidi ya Dodoma Jiji ambao utapigwa uwanja wa Jamhuri
Leo Wananchi wanakamilisha mchezo wao wa mwisho nyumbani msimu huu kwa kuikabili Ihefu Fc mchezo ukitarajiwa kupigwa uwanja wa Benjamin Mkapa
Afisa habari wa Yanga Hassan Bumbuli amesema baada ya mchezo wa mkoani Dodoma watakamilisha maandalizi yao ya mwisho jijini Dar es salaam kabla ya kuelekea Kigoma tayari kwa mchezo wa fainali kombe la Shirikisho la Azam dhidi ya Simba. Mchezo huo utapigwa Julai 25 katika uwanja wa Lake Tanganyika.
Bumbuli amesema wanatarajia kuwasili mkoani Kigoma Julai 22, siku tatu kabla ya mchezo ili kuwapa wachezaji muda wa kuzoea mazingira
Bosi huyo wa Kitengo cha Habari klabu ya Yanga, amesema wamedhamiria kushinda taji la FA, wana imani kubwa kuwa watafanikiwa
"Tumepanga kufika mapema siku tatu kabla ya mchezo ili kuwapa fursa wachezaji kuzoea hali ya hewa pamoja na benchi la ufundi kutoa mbinu za mwisho kabla ya mchezo wenyewe ambao tumejipanga kuhakikisha tunashinda," alisema Bumbuli.
Aidha Bumbuli amesema watakwenda Kigoma na kikosi cha wachezaji wote ambao wamesajiliwa na lengo kubwa siyo kushinda tu taji hilo, lakini pia kuwapa burudani mashabiki wao wa Kigoma ambao hawajaiona timu yao kwa muda mrefu.
