Baada ya ushindi wa bao 1-0 dhidi ya Simba, wachezaji wa Yanga wanatarajiwa kukabidhiwa 'mkwanja' wa maana kwa kuwanyamazisha watani zao katika mchezo wa ligi kuu uliopigwa juzi katika uwanja wa Benjamin Mkapa
Afisa Habari wa Yanga Hassan Bumbuli amesema baada ya mchezo dhidi ya Simba waliwapa wachezaji mapumziko ya siku tatu, watakaporejea watakabidhiwa bonus zao
"Wachezaji tuliwapa mapumziko ya siku tatu, watarejea kambini siku ya Jumatano.Kuhusu bonus iliyotengwa, haijawahi kutokea"
"Safari hii hatutapenda kutangaza, unajua wengine wanachukulia ushindi tunaopata unatokana na msukumo wa bonus. Lakini fahamu bonus watakayopata haijawahi kutokea," alisema Bumbuli
Katika hatua nyingine Bumbuli amesema bado wako katika mbio za ubingwa wa ligi kuu msimu huu
Bumbuli amesisitiza kuwa bingwa wa ligi kuu atapatikana baada ya msimu kumalizika licha ya Simba kuonekana kuhitaji angalau alama tatu tu
"Bado tuna nafasi ya kuchukua ubingwa, na hata kama ikitokea tofauti huu ndio msimu wao wa mwisho kushinda. Tuna mechi na Ihefu tarehe 13 na baadae Dodoma Jiji tarehe 18, zote tunashinda. Ifikapo Julai 23 sisi tutakuwa mabingwa yaani kabla ya mchezo wa fainali ya FA tutakuwa tumetangazwa kuwa mabingwa," alisema Bumbuli katika mahojiano na Azam TV
