Kocha wa makipa Yanga Razack Siwa amesema maandalizi kuelekea mchezo dhidi ya Simba utakaopigwa uwanja wa Benjamin Mkapa Jumamosi, Julai 03 yamekamilika
Akizungumza na Wanahabari katika Mkutano wa mechi, Siwa amesema timu iko tayari na wamepania kushinda mchezo huo
"Hakuna mtu asiyejua derby ya Simba na Yanga ilivyo, hakuna haja ya kuhamasishana sana lakini sisi tumejiandaa kupata ushindi," alisema Siwa
Aidha Siwa amesema nyota wanne watakosekana kutokana na sababu mbalimbali
"Tuna wachezaji wanakosekana kutokana na changamoto za hapa na pale, Haruna Niyonzima ni mgonjwa wakati Lamine Moro na Michael Sarpong wana majeraha. Pia Mapinduzi Balama yeye bado hajaanza mazoezi na timu"
"Wachezaji Abdallah Shaibu 'Ninja' na Yassin Mustafa wameshaanza mazoezi nasi hivyo wako tayari kuelekea mchezo huo," alisema Siwa
Nae nahodha Msaidizi Abdallah Shaibu 'Ninja' amesema wachezaji wote wako tayari kwa mchezo huo, wamejiandaa kuibuka na ushindi
"Tunamshukuru Mungu sote mimi na wachezaji wenzangu tuko salama. Tuko tayari kucheza na Simba, hatuangalii kama ni mchezo wa kwanza au wa ngapi, hatutakubali kufungwa na Simba," alisema Ninja
