Winga wa zamani wa Yanga, mkongwe Edibily Jonas Lunyamila amesema mchezo wa kesho dhidi ya Simba hautakuwa mwepesi kwa kila timu
Pamoja na kuiona Simba kuwa na kikosi bora zaidi kuelekea mchezo huo, Lunyamila amesema bado anaipa nafasi Yanga kuweza kuibuka na ushindi kutokana na kasi ya safu ya ushambuliaji
"Mechi itakuwa ngumu kwa pande zote mbili, lakini timu ambayo itatengeneza nafasi nyingi itakuwa na nafasi kubwa ya kuibuka na ushindi"
"Simba ni wazuri, wana wachezaji wenye uwezo mkubwa, lakini naipa nafasi Yanga kuibuka na ushindi kutokana na ukali wa safu yake ya ushambuliaji ikiongozwa na kina Tuisila Kisinda, Feisal Salum na Yacouba Sogne," alisema Lunyamila
"Siku za karibuni naona safu ya ushambuliaji imekuwa bora, wana kasi na ushirikiano mzuri katika kutengeneza mashambulizi"
"Mabeki wote wa Simba hawana kasi kama ilivyo kwa washambuliaji wa Yanga, kwa hiyo kama Yanga itapiga presha mara tatu kutokana na kasi yao lazima watapata bao kwani mechi ya kwanza iliyoisha kwa sare Kisinda alifanya safari moja tukapata penalti," aliongeza Lunyamila
Hata hivyo,Lunyamila ametoa tahadhari kwa safu ya ulinzi ya Yanga inapaswa kuwa makini sababu wapinzani wao Simba wana wachezaji wengi hatari, akiwemo nahodha wao, John Bocco na Luis Miquissone
