Baada ya kurejea jijini Dar es salaam kutoka Tabora ambako walifanikiwa kutinga fainali ya michuano ya kombe la Shirikisho la Azam (ASFC) kwa ushindi wa bao 1-0 dhidi ya Biashara United, kikosi cha Yanga kilielekea moja kwa moja kambini Kigamboni kuanza maandalizi ya mchezo dhidi ya Simba
Mchezo huo utaunguruma siku ya Jumamosi, Julai 03 kunako dimba la Benjamin Mkapa
Kocha Mkuu wa Yanga Nasreddine Nabi, amesema kikosi chake kimahesabu bado kiko kwenye mbio za kuwania ubingwa
Amesema ligi bado haijamalizika na katika mpira lolote linaweza kutokea
Lakini muhimu zaidi hawatakuwa tayari kuwa daraja la watani zao Simba kutangaza ubingwa
"Ni mechi ngumu na ushindani mkubwa kwa sababu kila mmoja wetu tunahitaji matokeo, kwetu ni lazima tushinde mechi hii kwa sababu bado tuko katika mbio za ubingwa na hatutaki kuwa daraja la wapinzani wetu kutangaza ubingwa kupitia mchezo huo," alisema Nabi
Tangu alipotua mwezi April kuchukua nafasi ya Kocha Cedric Kaze, Nabi amefanikiwa kukiimarisha kikosi cha Yanga hasa katika eneo la ushambuliaji
Chini yake, Yanga imefungwa mchezo mmoja tu na kutoka sare mchezo mmoja
Mchezo pekee aliopoteza ni mchezo wake wa kwanza kabisa baada ya kuanza majukumu yake dhidi ya Azam Fc na sare aliyopata ni kule Ruangwa ambako Yanga ilikataliwa bao halali lililopelekea mwamuzi kufungiwa
Amewaongoza Wananchi katika michezo nane, ushindi michezo sita
