Jumapili ya wiki hii Juni 27 2021, Wanachama wa klabu ya Yanga wanakwenda kuandika historia ambapo kupitia Mkutano Mkuu, watafanya marekebisho ya Katiba ili kuruhusu mfumo mpya wa uendeshaji wa klabu ya Yanga
Kwa miaka 86, Yanga imemilikiwa na Wanachama kwa asilimia 100 lakini sasa muundo huo unakwenda kubadilika kwa kuunda kampuni ambayo asilimia 49% ya hisa, zitauzwa kwa Wawekezaji watatu au wanne
Uongozi wa Yanga wakiongozwa na Mwenyekiti Dk Mshindo Msolla, GSM ambao wamejitolea kugharamia mchakato huo, wanastahili pongezi za dhati kwa hatua hiyo muhimu
Kwa wasiofahamu Yanga ilianza vuguvugu la Mabadiliko ya kiuendeshaji tangu mwishoni mwa miaka ya 90
Hata hivyo, kuliibuka na vikwazo vingi kufanikisha Mabadiliko hayo. Mara nyngi yamejitokeza makundi ambayo kwa maslahi yao, wanapinga Mabadiliko ya mfumo kwa hofu ya kupoteza 'ulaji'
Mbunge wa Kinondoni, Mh Abbas Tarimba anakumbuka jinsi Yanga iliosambaratika mwishoni mwa miaka ya 90 baada ya kuibuka kwa mgogoro wa Yanga Asili na Yanga Kampuni
Tarimba ambaye alikuwa Mwenyekiti wa Yanga wakati huo, amesema hitaji la Mabadiliko katika usimamizi na uendeshaji wa klabu kutokana na hali halisi halikuanza leo
"Wakati wa uongozi wetu kulikuwa na mgogoro baina ya klabu na wafadhili, aliyekuwa Katibu Mkuu, George Mpondela 'Castro' ndipo akaja na wazo la Mabadiliko ya mfumo wa uendeshaji wa klabu"
"Mpondela alileta wazo la kampuni baada ya wafadhili kujiondoa. Kwa bahati mbaya alishindwa kuliendesha wazo lake kutokana na migogoro. Tulilipokea wazo na tukaona tutengeneze mfumo wa klabu kujiendesha lengo ni kuachana na wafadhili waliokuwa wakituyumbisha"
"Tulikwenda kwenye Matawi yote, kwa ajili ya kuwaelimisha wanachama Mabadiliko na kuwapa nafasi ya kuuliza maswali ili waweze kukifahamu kile ambacho tunakilenga. Hapo ndipo ulipoibuka mgogoro wa Yanga Asili na Yanga Kampuni, kwamba Kampuni walikubali na Asili hawakutaka Mabadiliko chini ya Mzee Yusuf Mzimba
"Chanzo kikubwa ni mgongano wa kimaslahi kwa baadhi ya watu ndani ya klabu, ni tamaa tu ya watu wachache ambao waliamini iwapo mabadiliko yatafanyika, hawatapata nafasi ya kupata masilahi binafsi ndani ya klabu," alisema Tarimba
Lakini wakati huu Yanga chini ya Dk Msolla na kwa usaidizi wa GSM, wamepiga hatua zaidi na wanakaribia kufanikisha ndoto ya akina marehemu Mpondela waliyokuwa nayo tangu miaka ya 90
Wananchama wamepewa elimu ya kutosha na bila shaka Mkutano Mkuu utatumika kuivusha Yanga katika hatua muhimu zaidi yenye mafanikio
