Yanga iko Tabora wakisubiri kushuka uwanja wa Ali Hassan Mwinyi kuikabili Biashara United katika mchezo wa nusu fainali kombe la Shirikisho la Azam (ASFC)
Mchezo huo utapigwa kesho Ijumaa, ukitarajiwa kuanza saa tisa na nusu Alasiri
Yanga imedhamiria kuibuka mabingwa wa michuano hiyo hivyo hesabu ni kushinda mhchezo huo wa nusu fainali
Wananchi wameweka wazi kuwa wanataka kushiriki michuano ya Kimataifa msimu ujao kwa jasho lao wenyewe
Razak Siwa ambaye ni mkufunzi wa makipa wa Yanga amesema, wametua Tabora wakiwa na lengo moja la kusaka ushindi dhidi ya Biashara United
"Hatutaki kupoteza katika mchezo huu, lazima tupambane kutafuta matokeo mazuri, malengo yetu ni kushiriki michuano ya kimataifa kwa nguvu zetu, tunahitaji matokeo ya ushindi katika mchezo huu kwa ajili ya fainali," alisema Siwa
Yanga imepoteza matumaini ya kushinda ubingwa wa ligi kuu na sasa nguvu zote zimeelekezwa kwenye michuano ya FA
Tayari Wananchi wana tiketi ya kushiriki michuano ya Kimataifa msimu ujao lakini wanahitaji kushinda taji la FA kumaliza msimu na angalau kombe hilo ambalo pia litawapa tiketi ya kushiriki michuano ya kombe la Shirikisho barani Afrika
