Kocha Mkuu wa Yanga Nasreddine Nabi amekanusha tetesi zilizoripotiwa na baadhi ya vyombo vya habari kuwa amependekeza wachezaji 10 wasajiliwe msimu huu
Akizungumza na wanahabari jana baada ya mchezo dhidi ya Ruvu Shooting ambao Yanga walishinda mabao 3-2, Nabi alisema alitoa mwongozo wa wachezaji aliokuwa akiwahitaji
Kiungo Saido Ntibazonkiza ndiye aliyekuwa mkalimani wa Nabi aliyekuwa akizungumza lugha ya Kifaransa
"Mwalimu anasema hajapendekeza usajili wa wachezaji 10. Alichosema ni kuwa amewaelekeza viongozi maeneo ambayo wanapaswa kuyaimarisha, hakuna idadi ya wachezaji aliowataja"
"Lakini pia bado mpaka sasa hakuna mchezaji aliyeachwa, hajazungumza na mchezaji yeyote kuhusu hatma yake," alisema Saido
Aidha akizungumzia ushindi dhidi ya Ruvu Shooting, Nabi aliwapongeza wachezaji wake kwa kuweza kushinda mchezo huo licha ya kuwa hawakucheza kwa kiwango kile alichotaka
"Wachezaji wangu wamejitahidi ingawa walifuata maelekezo kwa wastani wa asilimia 40 tu. Tumepata wiki mbili za kujiandaa, baadhi ya wachezaji walikuwa na majukumu ya timu za Taifa na wengine majeruhi. Tutaendelee kujiimarisha naamini baadae wataelewa vyema mfumo tunaotaka wacheze. Kwa sasa tutaendelea kupambana kusaka matokeo katika kila mchezo"
