Mwaka juzi wakati Yanga ikinolewa Mwinyi Zahera iliwahi kukumbana na changamoto ya langoni baada ya Beno Kakolanya kugoma
Wakati huo Yanga ilikuwa na walinda lango watatu, Beno, Ramadhani Kabwili na Klaus Kindoki
Kindoki hakuwa akiaminiwa kabisa kwani hakuwa akitabirika langoni
Ndio wakati ambao Ramadhani Kabwili aliaminiwa na kuivusha salama Yanga na kufanikiwa kumaliza katika nafasi ya pili msimu wa 2018/19
Msimu huu Kabwili hajapata nafasi ya kucheza mchezo wowote kwenye ligi
Metacha Mnata na Farouk Shikhalo wametumika katika michezo 30, Metacha akicheza mechi nyingi zaidi
Jana Metacha alifanya makosa ambayo yaliwakera mashabiki na baadae akaenda mbali zaidi kwa kuwatusi walipokuwa wakimlaumu kwa kuruhusu mabao mepesi hasa bao la pili kwenye mchezo dhidi ya Ruvu Shooting
Tayari uongozi wa Yanga umetangaza kumsimamisha Metacha na pengine anaweza asionekane tena akiitumikia Yanga
Shikhalo na Kabwili wanatarajia kumalizia mechi zilizosalia kukamilisha msimu huu
Pengine ni wakati kwa benchi la ufundi kumuamini Kabwili, kwani Wananchi wanaamini anao uwezo wa kuliweka salama lango la Yanga
Alifanya hivyo tangu alipokuwa na umri wa miaka 17, akiweka rekodi ya kucheza mechi ya ligi ya mabingwa katika umri mdogo
