Msemaji wa Ruvu Shooting Massau Bwire ametamba kuwa timu yake itaondoka na ushindi kesho Alhamisi watakapokutana na Yanga kwenye mchezo wa ligi kuu
Huo utakuwa mchezo wa pili baina ya timu hizo msimu huu Yanga ikiondoka na ushindi wa mabao 2-1 katika mchezo wa kwanza
"Mimi naomba niwaambie Yanga waje na tahadhari hasa mashabiki wale wanaokuja na matokeo yao kuwa iwe isiwe lazima wachukue pointi tatu kwa Ruvu Shooting, mimi niwaambie ni Jambo ambalo halitawezekana na wasije wakaisumbua red cross mara mtu amepeleka macho juu, mara mtu ameanguka na kupoteza fahamu sababu tu ya kile walichokitarajia hakikuwa ivo," alitamba Bwire
Hata hivyo Yanga imepata wastani wa matokeo mazuri kila ilipokutana na Ruvu Shooting katika michezo iliyopigwa uwanja wa Benjamin Mkapa
Tangu mwaka 2016 Yanga imekutana na Ruvu Shooting mara tisa kwenye ligi, Wananchi wameshinda mechi saba, Ruvu Shooting wakishinda mchezo mmoja huku mchezo mmoja ukimalizika kwa matokeo ya sare
Yanga imepania kushinda mechi zote tano zilizobaki kuhakikisha hawawapi nafasi watani zao Simba kushinda ubingwa mapema
Kocha wa makipa Yanga Razak Siwa amesema lengo ni kushinda mechi zote zilizobaki na kuwa hatma ya ubingwa itaamuliwa na vile msimu utakavyomalizika
Mchezo utapigwa uwanja wa Benjamin Mkapa muda ukiwa saa moja usiku
