Baada ya uongozi wa Yanga kumaliza sintofahamu iliyokuwa ikimkabili nahodha wa Yanga Lamine Moro, beki huyo kutoka Ghana ameungana na wachezaji wenzake katika kambi ya timu hiyo kuendelea na maandalizi ya mechi za Ligi Kuu Bara zilizobakia
Awali ilielezwa Lamine amesimamishwa baada ya kutuhumiwa kufanya utovu wa nidhamu wakati timu ikiwa kambini mkoani Mtwara kujiandaa na mchezo wa ligi kuu dhidi ya Namungo Fc
Kaimu Katibu Mkuu wa Yanga, Haji Mfikirwa amesema baada ya kukutana na nyota huyo na baadae benchi la ufundi, wamemaliza sintofahamu iliyojitokeza awali
Mfikirwa alisema uongozi ulilazimika kulifanyia kazi suala hilo kwa sababu wanahitaji kuona kila mchezaji anafuata taratibu na kanuni za klabu hiyo kikamilifu.
"Tulisikiliza hoja za pande zote mbili, tulikutana na Lamine wakati timu mkoani, baadaye tukazungumza na kocha (Nabi), hivyo tumefanyia kazi hoja zao na sasa mambo safi na Lamine yuko kambini Avic Town, Kigamboni, akiendelea na mazoezi kwa ajili ya michezo yetu ijayo," Mfikirwa amenukuliwa na gazeti la Nipashe
Kutokana na adhabu aliyokuwa anaitumikia, Lamine alikosa mechi mbili za Ligi Kuu Bara dhidi ya Namungo FC na JKT Tanzania pamoja na mchezo wa hatua ya robo fainali mashindano ya Kombe la FA dhidi ya Mwadui Fc
