Usitishwe na umbile lake, mlinzi Dickson Job ni moja ya usajili makini ambao Wanayanga wanaweza kujivunia
Alikuwa Cedric Kaze, mkufunzi wa zamani wa Yanga aliyependekeza mlinzi huyu mwenye umri wa miaka 20 tu asajiliwe kutoka klabu ya Mtibwa Sugar
Kaze alimsajili Job huku akiwa na safu ya ulinzi imara eneo la kati iliyowajumuisha manahodha Lamine Moro na Bakari Nondo Mwamnyeto pamoja na Abdallah Shaibu 'Ninja' na Said Juma Makapu
Wapo waliohoji kwa ukuta huu Job amesajiliwa wa nini Yanga?
Lakini baada ya kucheza takribani mechi tano, Job amejibu maswali ya wengi
Hakuwa na mwanzo mzuri kwani alilazimika kusubiri takribani miezi mitatu kucheza mechi yake ya kwanza kutokana na majeraha
Job ni mlinzi anayetumia akili zaidi kuliko nguvu. Yuko vizuri mguuni, pasi makini na hodari wa kusoma mchezo
Utashangazwa na uwezo wake wa kucheza mipira ya juu. Katika mchezo wa ligi kuu uliopita dhidi ya JKT Tanzania ambao Yanga walishinda kwa mabao 2-0, Job ndiye alicheza mipira mingi ya kichwa mbele ya washambuliaji warefu wa JKT Tanzania wakiongozwa na Dani Lyanga
Job ni mchezaji kiraka, kwani pamoja na kumudu vyema safu ya ulinzi wa kati, Job anaweza kucheza kama mlinzi wa pembeni au kiungo mkabaji
Yanga wanamkosa nahodha Lamine Moro ambaye bado anasubiri ufumbuzi wa suala lake na benchi la ufundi, lakini hakuna hofu katika safu ya ulinzi
Wananchi wanafahamu wana Job, Nondo na Makapu na wakati huo wakisubiri Ninja apone majeraha ambayo yamemuweka nje kwa wiki mbili sasa
