Uongozi wa klabu ya Yanga leo ulimuhoji nahodha Lamine Moro ambaye anatuhumiwa kwa makosa ya utovu wa nidhamu aliyoyafanya wakati kikosi cha Yanga kikiwa mkoani Mtwara kujiandaa na mchezo dhidi ya Namungo Fc
Lamine alirejeshwa jijini Dar es salaam baada ya kutokea tofauti kati yake ya Kocha Nasreddine Nabi
Kaimu Katibu Mkuu wa Yanga Haji Mfikirwa amesema walimuita Lamine kutoa maelezo yake baada ya sintofahamu iliyotokea Mtwara
"Benchi la Ufundi limelalamika, na kwa nafasi yao walichukua hatua za awali zilizoko kwenye Mamlaka yao, kwa kuwa wamelileta kwa Uongozi, sasa ni muhimu Sana tukamsikiliza mlalamikiwa kisha kutoa maamuzi kama klabu," alisema Haji.
Mfikirwa alisisitiza kuwa suala la Lamine ni la kinidhamu lililoanzia kwenye bechi la ufundi na halihusiani chochote na kuidai klabu, nyota huyo hana deni lolote analodai
"Lamine hadai chochote, hivyo taarifa za kwamba anaidai klabu ni za uzushi na zipuuzwe, suala lake limetokana na masuala ya benchi la ufundi, na tutalitolea taarifa baada ya kamati kukaa na kusikiliza"
Inaelezwa kocha Nabi alimtaka Lamine ambaye ni majeruhi ahudhurie mazoezi kuangalia kile kilichokuwa kinafanyika
Hata hivyo Lamine alisisitiza kuwa alihitaji kuonana na daktari wake hivyo asingeweza kuhudhuria program hizo
