Sanga atangaza Kamati ya Mabadiliko Yanga

Kaimu Mwenyekiti wa Yanga Clement Sanga leo ametangaza majina ya wajumbe wa Kamati iliyoundwa kupendekeza/kushauri mfumo wa mabadiliko ya uendeshaji wa klabu ya Yanga.

Akizungumza na waandishi wa Habari Makao Makuu ya klabu ya Yanga jijini Dar es salaam leo, Sanga amesema Kamati hiyo imeundwa na wataalamu waliobobea katika nyanja mbalimbali.

Kamati hiyo yenye Wajumbe sita itaongozwa na Mwenyekiti Alex Mgongolwa ambaye kwa taaluma yake ni Mwanasheria.

Wajumbe wa Kamati hiyo ni pamoja na Prof Gamaliel Mgongo Fimbo, mtaalamu wa masuala ya Katiba na Sheria za Ardhi, Said Mecky Sadik aliyewahi kuwa Mkuu wa Mkoa wa Dar es salaam na baadae Kilimanjaro.

Wengine ni George Fumbuka, mshauri wa masuala ya uwekezaji, Felix Mlaki, mchumi na mtaalamu wa masuala ya fedha.

Pia yumo Mohammed Nyenge, ambaye kitaaluma ni mchumi lakini pia akiwa Mwenyekiti wa Kamati ya uchumi na Mipango ya klabu ya Yanga.

Kamati hiyo itapendekeza mfumo wa mabadiliko ya uendeshaji wa klabu ya Yanga.

Baada ya kupokea mapendekezo hayo, Kamati ya Utendaji wa Yanga itaanza rasmi mchakato wa mabadiliko kwa kutoa elimu kwa Wanachama kisha kuitisha Mkutano Mkuu utakaopitisha mfumo huo mpya utakaokuwa umependekezwa.