Mabingwa wa kihistoria Tanzania Yanga leo majira ya saa 11 jioni watashuka katika uwanja wa Benjamin Mkapa kuwakabili wapinzani wao Simba katika mchezo wa dabi, ligi kuu ya Vodacom
Ni mchezo ambao utasimamisha nchi kwa takribani masaa mawili kwa miamba hao wa soka kuonyeshana kazi ndani ya dimba la Mkapa
Kwa Yanga huu ni mchezo muhimu kupata ushindi ili kuendelea kubaki katika mbio za kuwania ubingwa wa VPL msimu huu
Yanga iko nyuma kwa tofauti ya alama nne dhidi ya watani zao Simba ambao wanaongoza ligi wakiwa na alama 61
Pia utakuwa mchezo wa kwanza wa dabi kwa kocha Mohammed Nasreddine Al Nabi aliyetua Yanga mwezi uliopita kuchukua mikoba ya Cedric Kaze
Ni dabi ya Kariakoo, mechi ambayo kitakachofanyika ndani ya dakika 90 kinaweza kuwa na athari hasi au chanya kwa timu na hata mchezaji mmoja mmoja
Pamoja kuvuna sifa na kuilinda heshima ya Yanga, kama wachezaji watajitoa leo na kuondoka na ushindi, watatoa ujumbe kwa watani zao kuwa wanaweza kumfunga yeyote nje ya Tanzania, lakini hapa ndani mfalme ni mmoja tu, Yanga
Ni mchezo ambao wachezaji watajaa 'mapesa' kama watafanikiwa kuwapa furaha mabosi wao ambao wameweka mezani ahadi kubwa ya fedha kwa ajili yao
Huu ni mchezo wa heshima, mechi ambayo inaweza kuipandisha au kuishusha thamani ya mchezaji
Wapinzani wao Simba kupitia msemaji wao, wamekuwa wakitamba kila kona, wanajitapa kuwa watashinda huku wakiwabeza wachezaji wa Yanga
Dharau, kashfa na kebehi wanaweza kuzijibu leo kwa kuhakikisha wanakwenda 'kuwalaza na viatu' mapema
Yanga haijawahi kushindwa inapokuwa na jambo lake, kwa hakika leo pia hawatashindwa kuwapa furaha mashabiki wao pale kwa Mkapa
Sapoti ya mashabiki pia ni muhimu sana , Afisa Mhamasishaji wa Yanga Antonio Nugaz amewataka mashabiki kujitokeza kwa wingi wakiwa kifua mbele na kutamba kwani leo wanapeleka kilio Msimbazi
