Kocha Mkuu wa Yanga Nasreddine Nabi amesema kikosi chake kiko tayari kwa mchezo wa dabi dhidi ya Simba ambao utapigwa kesho Jumamosi katika uwanja wa Benjamin Mkapa
Akizungumza katika kikao na Wanahabari leo, Nabi amesema mchezo kati ya Simba na Yanga, ni moja ya mechi kubwa za dabi hapa Afrika
Amesema anafahamu anakwenda kukutana na Simba ambayo iko katika kiwango bora wakipata mafanikio kwenye michuano ya ligi ya mabingwa barani Afrika
Hata hivyo pamoja na kuwaheshimu Simba, Nabi amesema wamejiandaa kikamilifu kupambana nao na kuwa hawaogopi
"Simba ni timu nzuri lakini ina mapungufu yake, tunaiheshimu lakini hatuihofii. Maandalizi ya mechi ni yale yale kama ya michezo mingine tofauti ni uchezaji"
"Tunajua mchezo utakuwa mgumu lakini tumejiandaa kushinda," alisema Nabi
Naye Haruna Niyonzima aliyeambatana na Nabi katika Mkutano huo, amesema wachezaji wamejiandaa kupambana kuhakikisha wanapata matokeo mazuri katika mchezo huo
Amesema ni mchezo mkubwa ambao unahitaji wachezaji wakubwa, mchezo huo utatoa nafasi kwa wachezaji kudhihirisha kuwa hawakusajiliwa Yanga kwa bahati mbaya
