Naibu Waziri wa Utumishi na Utawala Bora Deogratius Ndejembi amezitaka timu zinazofungwa na Yanga kukubali matokeo badala ya kutoa visingizio vya kuhongwa
Ndejembi ametoa kauli hiyo siku chache baada ya kauli ya nahodha wa Tanzania Prisons Benjamin Asukile ambaye aliituhumu Yanga kutoa hongo ya Tsh Milioni 40 katika mchezo wa kombe la FA dhidi ya Wajelajela hao, mchezo ambao ulimalizika kwa Yanga kushinda bao 1-0
Yanga ilimtaka Asukile athibitishe tuhuma zake na wakati huohuo ikichukua hatua kwa kumfikisha kwenye vyombo husika aweze kuchukuliwa hatua
Ndejembi amesema Yanga ni miongoni mwa timu bora na zenye historia kubwa barani Afrika, hivyo ni jambo la ajabu timu kudai kuhujumiwa pale zinapofungwa na Yanga
"Kumekuwa kuna tabia ya viongozi wa timu hapa nchini hasa wakifungwa na Yanga kihalali hutoa kauli kwamba wamehongwa, ifike wakati wakubali wanapofungwa wakubaliane na matokeo," alisema
Katika hatua nyingine,Waziri wa Habari, Utamaduni, Sanaa na Michezo, Innocent Bashungwa amesema Serikali haitofumbia macho wanaotumia rushwa kujipatia ushindi
