Kocha Mkuu wa Yanga Nasreddine Nabi anakiandaa kikosi chake kuelekea mchezo dhidi ya Simba ambao utapigwa Jumamosi, May 08 katika uwanja wa Benjamin Mkapa
Hii itakuwa mara ya pili Nabi anawakabili Simba katika mwaka huu kwani aliiongoza Al Merrikh katika mchezo wa ligi ya mabingwa uliopigwa Sudan ambao ulimalizika kwa suluhu ya bila kufungana. Nabi aliachana na Al Merrikh baada ya mchezo huo
Baada ya kuivusha Yanga hatua ya robo fainali michuano ya kombe la Shirikisho la Azam (ASFC) kwa ushindi wa ugenini dhidi ya Tanzania Prisons, Nabi amesema matokeo hayo yamekiongezea kikosi chake morali kuelekea mchezo dhidi ya Simba
Aidha kocha huyo raia wa Tunisia amesisitiza kuwa hawatakuwa tayari kupoteza mechi mbili mfululizo katika ligi baada ya kupoteza mchezo dhidi ya Azam Fc
"Simba inafanya vizuri katika msimamo wa Ligi Kuu Tanzania bara, lakini hilo halituzuii kufanya vema katika mchezo dhidi yao Jumamosi na kuondoka na pointi tatu"
"Baada ya kupata matokeo na kuingia hatua ya nane bora tunarudi kutafuta pointi tatu, najua utakuwa mchezo mgumu kwa upande wetu lakini naamini tunaenda kupata ushindi na kuondoka na pointi tatu, " alisema Nabi
"Naiheshimu Simba ni timu nzuri yenye wachezaji wazuri lakini kwa maandalizi tunayofanya, naamini tunaenda kuchukua pointi tatu na kupunguza idadi ya pointi walizotuzidi"
Mchezo wa Jumapili utakuwa wa pili kuzikutanisha timu hizo msimu huu katika michuano yote
Mchezo wa kwanza ni ule wa ligi kuu duru ya kwanza ambao ulimalizika kwa matokeo ya sare ya bao 1-1
Watani hao wa jadi wakakutana tena visiwani Zanzibar kwenye mchezo wa fainali michuano ya kombe la Mapinduzi, Yanga ikiibuka washindi kwa mikwaju ya penati baada ya mchezo kumalizika kwa suluhu ya bila kufungana
Takwimu za kuanzia msimu uliopita, Yanga imepoteza mchezo mmoja tu dhidi ya Simba (ASFC) katika michezo mitano waliyocheza.
Wameshinda mechi mbili na kutoka sare miwili
