Mwinyi atuma ujumbe mzito Yanga

Baada ya kufanya vizuri kwenye michuano ya Chalenji, mlinzi wa kushoto wa Yanga Haji Mwinyi ameutahadharisha uongozi wa Yanga kuwa atalazimika kuondoka kama hatapata nafasi ya kucheza.

Mwinyi amenukuliwa na mtandao wa GOAL, akisema kwamba hatakuwa na uvumilivu tena iwapo kocha George Lwandamina hatampanga.

"Natambua kuwa hatuwezi kucheza wachezaji 12, uwanjani lakini kitendo cha kukaa benchi mfululizo kwangu hakinifurahishi kwani nahofia kupoteza kiwango changu nivyema kama sitokuwepo kwenye mipango ya timu basi wanaruhusu kuondoka nikatafute sehemu ambayo nitapewa nafasi ya kucheza," amesema Mwinyi.

Aidha Mwinyi amesema ataendelea kucheza kwa kujituma ili kumshawishi kocha Mzambia George Lwandamina, kumrudisha kwenye kikosi cha kwanza vinginevyo anapanga kuachana na timu hiyo pindi mkataba wake utakapomalizika mwishoni mwa msimu huu.

Hakuna shaka juu ya kiwango cha Haji Mwinyi sasa, michuano ya Chalenji imemuimarisha zaidi.

Lakini bado linabaki kuwa jukumu la kocha kuamua ni nani acheze kwa kuangalia mahitaji ya timu kwa wakati huo.

Yanga inakabiliwa na michuano mingi sana mwaka 2018 hivyo hapana shaka Mwinyi atapata nafasi ya kucheza muhimu ni kuwa mvumilivu tu.