Yanga imedhamiria kujisahihisha kwa kupata kocha mapema ambaye ataweza kuiimarisha timu na kuwa na muda wa kutosha kuiandaa pale msimu utakapomalizika
Kumekuwa na tetesi nyingi kuhusu ujio wa kocha huyo, Wananchi wameaswa kusubiri taarifa rasmi kutoka kwa uongozi
Lakini kwa uhakika kocha mpya atawekwa hadharani mapema kabla ya msimu kumalizika
Awali kulikuwa na tetesi za ujio wa kocha Sebastian Migne, lakini leo zimeibuka tetesi nyingine kuwa Yanga wameachana na mpango wa kumleta Migne na huenda wakamtangaza kocha wa zamani wa Al Merrikh Nasredinne Al Nabi mwenye uraia wa Ubelgiji na Tunisia
Lakini zipo taarifa za ndani kuwa mabosi wa Yanga waliwasiliana na kocha wa AS Vita Florente Ibenge kuona uwezekano wa kumleta nchini
Ibenge anaweza kuachana na AS Vita baada ya timu hiyo kukumbwa na ukata ambao ulipelekea kuuza wachezaji wake muhimu
Wakati alipokuja na AS Vita kucheza na Simba, Ibenge alisema kuwa wachezaji wengi wa Kikongo wanakimbilia Tanzania kwa kuwa timu za Tanzania sasa zina fedha kuliko DR Congo
Ibenge anaweza kuwa kocha sahihi kutua Yanga kutokana na uzoefu wake lakini muhimu zaidi anao ushawishi wa kuwaleta wachezaji wazuri
Pengine ni wakati naye kuelekea kwa Wananchi kujiunga na akina Tuisila Kisinda na Mukoko Tonombe ambao aliidhinisha wasajiliwe na Yanga usajili wa dirisha kubwa Julai mwaka jana
