Yanga jana imepata ushindi muhimu wa bao 1-0 dhidi ya Biashara United katika mchezo wa ligi kuu ya Vodacom uliopigwa uwanja wa Benjamin Mkapa
Ulikuwa mchezo ambao Yanga ilihitaji ushindi huu ili kuinua morali ya wachezaji wake baada ya mfululizo wa matokeo yasiyoridhisha
Katika mchezo huo Yanga ilionyesha dhamira ya kusaka matokeo tangu dakika ya kwanza huku Biashara United wakicheza kwa kujilinda zaidi
Kuanzishwa kwa Carlos Carlinhos eneo la kiungo kuliinufaisha sana Yanga katika umiliki wa mpira na hata katika kuanzisha mashambulizi
Carlinhos alitawala kiungo, akishirikiana na Mukoko kuifanya timu iwe na uwiano mzuri wakati inashambulia na hata pale inapozuia
Safu ya ulinzi ilikuwa chini ya Abdallah Shaibu na Dickson Job. Pamoja na baadhi ya mashabiki kuonyesha wasiwasi pale orodha ya kikosi ilipotolewa na Job kuanza katika kikosi cha kwanza, bila shaka baada ya mchezo hawakuwa na la kusema zaidi ya kupongeza
Kwa hakika pacha ya Lamine Moro na Bakari Nondo Mwamnyeto katika eneo la ulinzi, iko hatarini kuvunjwa na vijana hawa
Yacouba Songne akafunga bao lake la sita akimalizia krosi murua iliyochongwa na Adeyum Saleh baada ya Mukoko, Kaseke, Carlinhos, Saido, kutengeneza mipango
Songne amefunga katika mchezo wa pili mfululizo kwani ndiye aliyefunga bao la Yanga katika mchezo uliopita dhidi ya KMC
Kwa ujumla jana Yanga ilicheza vizuri zaidi ukilinganisha na mechi zilizopita karibuni
