Mikiki mikiki ya ligi kuu ya Vodacom inaendelea leo katika viwanja tofauti ambapo jijini Dar es salaam vinara wa ligi hiyo Yanga watashuka uwanja wa Benjamin Mkapa kuikaribisha Biashara United
Ni mchezo ambao Yanga inahitaji alama zote tatu ili kuweka hai matumaini ya kuwania ubingwa msimu huu
Wachezaji wa Yanga wanafahamu matokeo tofauti na ushindi, yanaweza kuwapa nafasi watani zao Simba kuwaondoa kileleni kesho watakapocheza na 'vibonde' Mwadui Fc mkoani Shinyanga
Kaimu Kocha Mkuu wa Yanga Juma Mwambusi amesema mchezo wa leo ni mwanzo mpya kwao baada ya mfululizo wa matokeo yasiyoridhisha
Amesema wanahitaji kushinda leo ili kurejesha morali ya ushindi katika kikosi lakini pia kuhakikisha wanashinda michezo yote 10 iliyobaki kumaliza msimu
Mwambusi atakuwa na kikosi chake kamili akiwakosa wachezaji wawili tu, Yassin Mustafa na Mapinduzi Balama
Kiungo mshambuliaji Carlos Carlinhos leo anaweza kurejea kikosini baada ya kumaliza adhabu ya kadi nyekundu iliyomfanya akose michezo mitatu iliyopita
Mashabiki wa Yanga wameaswa kusahau yaliyopita, wajitokeze kwa wingi kuiunga mkono timu yao katika mchezo huo utakaopigwa kuanzia saa moja usiku
