Moja ya eneo ambalo viongozi wa Yanga hawawezi kukwepa lawama ni katika maamuzi ya kupata kocha mpya pale wanapofanya mabadiliko
Kwa kiasi kikubwa msimu huu Yanga imeathiriwa na mabadiliko ya makocha katika muda ambao sio sahihi
Tangu mwanzo mwa msimu Yanga ilichelewa kumleta kocha mpya. Baada ya mpango wa kumpata kocha Cedric Kaze kukwama, wakamuajiri Zlatko Krmpotic wiki moja kabla ya ligi kuanza
Baada ya siku 37 wakaachana na Krmpotic na kurudi kwa Kaze ambaye pia walilazimika kumsubiri kwa takribani wiki tatu kabla ya kuwasili nchini
Naye akatua wiki moja kabla ya ligi kurejea kutoka kwenye mapumziko ya kalenda ya Kimataifa mwezi Oktoba 2020
Hata hivyo Kaze akaondolewa baada ya miezi mitano tu licha ya kocha huyo 'kuipotezea' Yanga muda mrefu wa kumsubiri
Utaratibu ukawa uleule tena baada ya Kaze kuondolewa wengi walitarajia kocha mpya angewasili mapema hasa ikizingatiwa kulikuwa na mwezi mmoja wa mapumziko kutokana na kalenda ya Kimataifa
Lakini siku chache baada ya mchakato wa kusaka kocha mpya kuanza, uongozi ukatangaza wameamua kumuachia timu kocha Juma Mwambusi mpaka mwisho wa msimu ingawa kulikuwa na taarifa kuwa uongozi ulikusudia kumleta kocha mpya mapema ili apate nafasi ya kukifahamu kikosi kwa undani ili imsaidie katika maboresho mwishoni mwa msimu
Baada ya sare dhidi ya KMC presha ya kuleta kocha mpya imerejea tena na pengine kama Yanga haitapata matokeo Jumamosi katika mchezo dhidi ya Biashara United, mwishoni mwa wiki kunaweza kushuhudiwa mabadiliko mengine ya kocha
Kwa kweli hapa viongozi hawawezi kukwepa lawama za mashabiki kwani wamekuwa wazito sana kufanya maamuzi hasa katika kuajiri makocha wapya
Mara nyingi timu inapofukuza kocha lazima iwe tayari na mpango wa mbadala wa kocha huyo
Kocha wa muda hapaswi kuachiwa timu kwa muda mrefu kwani ikiwa hivyo, yakifanyika mabadiliko lazima yataathiri mwenendo wa timu
Mabadiliko ya kocha wakati huu hayawezi kuisaidia sana Yanga kwani kocha mpya hatakuwa na muda wa kuitengeneza timu yake vile anavyotaka
Ni vigumu kuandaa timu wakati kukiwa na presha kubwa ya matokeo
