Baada ya mapumziko ya mwezi mzima kupisha kalenda ya michuano ya Kimataifa pamoja na maombolezo ya kifo cha aliyekuwa Rais wa Tanzania, awamu ya tano Hayati Dk John Magufuli aliyefariki dunia Machi 17, vinara wa ligi kuu ya Vodacom Yanga leo wanarejea 'mzigoni' pale uwanja wa Benjamin Mkapa kuanzia saa moja usiku
Wananchi watakuwa pale kwa Mkapa kuwakabili KMC katika mchezo wa ligi kuu ya Vodacom mzunguuko wa 24
Hii ni ngwe ya lala salama, ni mchezo ambao Yanga inahitaji alama zote tatu ili kuendelea kuweka hai matumaini ya kutwaa ubingwa
Kaimu Kocha Mkuu wa Yanga, Juma Mwambusi, amesema wamejiandaa vizuri kukabiliana na KMC leo kwa kucheza soka la burudani na sio kukaa nyuma kuhakikisha wanapata ushindi
Amesema kikosi chake kitaingia uwanjani wakiwa na tahadhari kubwa wakijua wanakutana na timu nzuri na ngumu
Nae nahodha wa Yanga Lamine Moro, amesema wapo tayari kupambana kwani anajua ni mchezo mgumu na katika kipindi chote alichokuwa Yanga hajawahi kukutana na mechi nyepesi, hivyo ni jukumu lao wachezaji kuipigania timu
Moro aliongeza kuwa bado hawajakata tamaa ya kuwania ubingwa akiwaalika mashabiki kujitokeza kwa wingi kuwaunga mkono
Yanga leo itawakosa wachezaji wanne ambao wanakabiliwa na changamoto mbalimbali
Yassin Mustafa na Farid Mussa ni wagonjwa wakati Haruna Niyonzima anakosekana kwa kuwa alichelewa kurejea kambini akitokea Rwanda kwenye majukumu ya Kimataifa
Kiungo Carlinhos anatumikia adhabu ya kadi nyekundu, leo akimalizia adhabu hiyo aliyopewa katika mchezo wa kombe la FA dhidi ya Ken Gold mwezi uliopita
