Ukipita kwenye kurasa za mitandao ya kijamii utakutana na tetesi nyingi zinazomuhusu aliyekuwa Mwenyekiti wa klabu ya Yanga Yusufu Manji ambaye anatajwa kuwa mbioni kurejea nchini
Ukitaja jina la Manji kuna watu wanatetemeka kwani wanakumbuka kipindi ambacho alikuwa Mwenyekiti wa Yanga, hakuna timu iliyothubutu kutamba ndani ya ardhi ya Tanzania mbele ya Yanga
Changamoto alizopata mwishoni mwa mwaka 2016 zilipelekea ajiuzulu nafasi yake na kujikita katika kushughulikia kesi zilizokuwa zikimkabili
Na hata baada ya kufanikiwa kushinda kesi zote, Manji alilazimika kusafiri nje ya nchi kwenda kutibiwa maradhi ya moyo yaliyokuwa yakimsumbua
Gazeti moja la michezo limedai kuwa Manji yuko mbioni kurejea nchini kuendelea na maisha yake
Wananchi wanatamani kuona pale atakaporejea, aingie kwenye uwekezaji Yanga
Yanga iko katika mchakato wa kubadili mfumo wake wa uendeshaji ambapo mchakato huo utakapokamilika, utatoa nafasi kwa wawekezaji kununua hisa asilimia 49 zitakazowekwa sokoni
Kulingana na mwongozo wa Serikali, hisa hizo zinapaswa kumilikiwa na wawekezaji watatu au zaidi
Manji anaweza kuwa na nafasi ya kununua hisa kuwa miongoni mwa wawekezaji
Wakati GSM wakitarajiwa kuwa Wawekezaji namba moja, pia yuko Rostam Aziz ambaye kampuni yake ya Taifa Gas inaidhamini Yanga
Wafanyabiashara hawa watatu wanaweza kuifanya Yanga ikawa timu ya kipekee barani Afrika kama itatokea wote wakawa wanahisa
