Ndivyo wananchi wanavyosema baada ya 'kuwacheki' watani zao Simba wakipata mafanikio kwenye michuano ya ligi ya mabingwa wakifanikiwa kutinga robo fainali
Simba imepata matokeo mazuri katika michuano hiyo, Wananchi wanasema tambo zao wazifanyie hukohuko hapa nyumbani mfalme ni mmoja tu, Yanga
Upo msemo wa binti mdogo ambaye kipande cha video aliyorekodi imetamba sana kwenye mitandao ya kijamii akiwashangaa mashabiki wa Simba wanaoitambia Yanga baada ya kupata mafanikio huko nje
"Unawafunga wengine unaitambia Yanga, kunguru sio njiwa...!"
Timu hizo zilipokutana kwenye mchezo wa duru ya kwanza VPL, matokeo yalikuwa sare ya bao 1-1
Simba walilazimika kusubiri mpaka dakika ya 87 kusawazisha bao kupata sare ambayo waliishangilia kwelikweli
Zilipokutana kwenye michuano ya kombe la Mapinduzi kule visiwani Zanzibar, ni Yanga iliyoibuka kidedea kwa ushindi wa mikwaju ya penati baada ya suluhu ya bila kufungana
Katika mchezo ule, Yanga walikuwa bora zaidi, pengine walistahili kushinda ndani ya dakika 90
Yanga bado wanaendelea kuwa wafalme wa 'dabi' pamoja na kuwa misimu mitatu iliyopita wamepita katika msukosuko mkubwa wa kiuchumi
Katika misimu miwili Simba imepata ushindi mara moja tu mbele ya Yanga katika michuano ya kombe la FA
Kwenye ligi huu ni msimu wa pili Simba haijafanikiwa kuondoka na ushindi mbele ya Yanga
Msimu uliopita walipata sare mchezo wa kwanza na wakafungwa katika mchezo wa pili
Msimu huu mechi ya kwanza ilimalizika kwa sare na mechi ya pili itapigwa May 08
Wananchi wana kila sababu ya kutamba, kwani ndio wababe wao...!
