Kaimu Kocha Mkuu wa Yanga Juma Mwambusi atakuwa na wakati mzuri pale ligi itakaporejea kwani asilimia 99 ya wachezaji wake wako fiti
Kwa sasa mchezaji pekee anayekosekana kikosini ni kiungo Mapinduzi Balama ambaye anafanya program ya peke yake ya mazoezi
Juzi wachezaji waliokuwa na majukumu ya Kimataifa Saido Ntibazonkiza na Haruna Niyonzima walirejea wakati Mukoko alirejea mapema zaidi
Tangu mwezi Januari 2021 baada ya michuano ya kombe la Mapinduzi, Yanga iliandamwa na majeruhi kwa wachezaji wake muhimu Yacouba Songne, Michael Sarpong, Saido Ntibazonkiza na Dickson Job ambaye bado hajacheza hata mechi moja tangu aliposajiliwa dirisha dogo
Job sasa amepona tayari kuwapa changamoto kina Lamine Moro na Bakari Nondo Mwamnyeto ambao wamekuwa chaguo la kwanza kwenye safu ya ulinzi
Lakini pia kurejea kwa Ntibazonkiza ni faida kubwa kwa Mwambusi. Kama atamtumia vizuri nyota huyu kutoka Burundi ataongeza makali katika safu ya ushambuliaji
Haruna Niyonzima alikuwa na wakati mzuri sana wakati akiitumikia timu ya Taifa ya Rwanda. Alionyesha kiwango kizuri sana katika michezo dhidi ya Msumbiji na Cameroon
Nae anaweza kuwa na mchango mkubwa kuelekea mechi za kukamilisha msimu
Mwambusi ataongoza mchezo wake wa kwanza akiwa Kaimu Kocha Mkuu dhidi ya KMC Jumamosi ijayo pale uwanja wa Benjamin Mkapa
