Keshokutwa Jumanne uongozi wa klabu ya Yanga chini ya Mwenyekiti Dk Mshindo Msolla unatarajiwa kutoa tamko baada ya kufungiwa kwa Makamu Mwenyekiti Fredrick Mwakalebela
Juzi Kamati ya Maadili ya Shirikisho la Mpira wa Miguu Tanzania (TFF) ilitangaza kumfungia Mwakalebela kifungo cha miaka mitano baada ya kumpata na hatia ya makosa mawili, uchochezi na kutoa taarifa ya uongo
Mwakalebela pia alipigwa faini ya jumla ya Tsh Milioni saba kutokana na makosa hayo ambayo kulingana na taarifa ya kamati ya Maadili, imeeleza aliyafanya katika mikutano aliyofanya na Wanahabari Oktoba 1 2020 na Februari 19 2021
Miongoni mwa hatua za haraka ambazo zinatarajiwa kuchukuliwa na Yanga ni kukata rufaa kupinga kifungo hicho cha Mwakalebela
Ni hivi karibuni Yanga ilishinda rufaa ya kifungo dhidi ya Mkuu wake wa Idara ya Habari na Mawasiliano Hassan Bumbuli aliyekuwa amefungiwa miaka mitatu na Kamati hiyo hiyo ya Maadili kwa makosa ya kutoa taarifa za uongo
