Mshauri wa Yanga Senzo Mazingisa amesema wameamua kumleta kocha mpya mapema kwa lengo la kuongeza nguvu katika mbio za kuwania ubingwa wa ligi kuu pamoja na michuano ya kombe la FA
Yanga iko katika hatua za mwisho kukamilisha mchakato wa kumpata kocha mpya ikielezwa mtaalamu huyo atatua nchini wakati wowote
Senzo amesema baada ya kufanya tathmini, pamoja na kumuamini kocha Juma Mwambusi, wanaamini ujio wa kocha mpya utawaongezea wachezaji ari mpya
"Tumeona ni lazima tupate kocha mpya haraka na mchakato ulikuwa unaendelea na sasa tupo katika hatua ya mwisho kabisa, tunataka kuhakikisha kabla ya timu haijarejea uwanjani tuwe tayari ameshakuja," Senzo alinukuliwa na Mwanaspoti
“Tunaona kuna nafasi kubwa ya kuwa bingwa msimu huu bila kujali tulivyoteleza hapa kati, huu ni upepo tu na umepita hatua muhimu ni kuinuka na kuendelea na safari kwa umakini"
"Siyo hatumuamini Mwambusi, tunaheshimu kazi kubwa anayofanya sasa na hata kabla kocha Mwambusi lakini tunataka kumuongezea mtu ambaye atasaidiana naye kuweza kufikia malengo yetu"
"Hata kocha atakayekuja tutataka afanye kazi na Mwambusi ili aweze kumsaidia kujua historia ya kikosi na hata aina ya ligi ya hapa hataweza kufanikiwa bila kuwa na msaada wa aina ya Mwambusi," aliongeza Senzo
Wakati Wananchi wakisubiri kutambulishwa kwa kocha huyo, kikosi kinaendelea na mazoezi Avic Town, Kigamboni kujiandaa na mechi za kuhitimisha msimu
Ligi itarejea baada ya kumalizika siku 21 za maombolezo ya kifo cha aliyekuwa Rais wa Jamhuri ya Muungano wa Tanzania, Awamu ya Tano, hayati Dk John Magufuli
