Mwishoni mwa mwezi May, msimu wa ligi kuu ya Vodacom 2020/21 utafika tamati na kukaribisha msimu mwingine 2021/22
Tayari tetesi za usajili zimeanza kushika kasi timu zikianza kuangalia wachezaji wanaoweza kuwajumuisha kuongeza nguvu katika vikosi vyao kwa ajili ya msimu ujao
Yanga imekuwa na msimu mzuri mpaka sasa licha ya maboresho makubwa yaliyofanyika msimu uliopita
Wananchi waliongeza wachezaji 17 wapya, bado maboresho mengine yatafanyika mwishoni mwa msimu huu
Ndio maana tetesi zimeanza mapema, ambapo Yanga inahusishwa kumuwania nahodha wa Gor Mahia Kenneth Muguna
Kiungo huyo mwenye umri wa miaka 24, atakuwa mchezaji huru mwishoni mwa msimu
Muguna anatajwa kuwa kiungo bora katika ligi kuu ya Kenya katika misimu miwili iliyopita
Ni kiungo mshambuliaji mwenye rekodi nzuri ya kufunga mabao ambaye pia hucheza timu ya Taifa ya Kenya
Wakati Mapinduzi Balama akiwa majeruhi, wakongwe Saido Ntibazonkiza na Haruna Niyonzima ndio wachezaji wanaotegemewa zaidi kutengeneza nafasi za mabao pale mbele
Ntibazonkiza amekabiliwa na majeraha mara kwa mara wakati Niyonzima umri unazidi kumtupa mkono, pengine ni wakati kwa Yanga kusaka mbadala wa wachezaji hawa ambaye umri wake bado
Muguna anaweza kuwa chaguo sahihi kuongeza nguvu msimu ujao
