Kaimu Kocha Mkuu wa Yanga Juma Mwambusi anapambana kurejesha utimamu wa wachezaji wake kabla ya kurejea kwa mikiki mikiki ya ligi kuu na michuano ya kombe la FA
Baada ya kutangazwa kuiongoza Yanga mpaka mwishoni mwa msimu, Mwambusi aliandaa program maalum ya mazoezi ambayo iliwataka wachezaji kufanya mazoezi mara mbili kwa siku isipokuwa siku ya Ijumaa ambayo wanafanya mara moja
Hata hivyo kutokana na kifo cha aliyekuwa Rais wa Jamhuri ya Muungano wa Tanzania awamu ya tano hayati Dk John Magufuli, Yanga imesitisha mazoezi kwa muda wakati huu wa maombolezo timu ikitarajiwa kurejea kambini Ijumaa
Mwambusi amesema alibaini madhaifu ya baadhi wachezaji kutokuwa fiti, hivyo aliandaa program ambayo itawarejesha katika ubora wao
"Tumeanza na mazoezi ya kutengeneza 'fitness' ya wachezaji. Tunakwenda vizuri, naamini tutakaa sawa baada ya muda mfupi," alisema Mwambusi
Mwambusi anafahamika kwa umahiri wake katika kujenga utimamu wa wachezaji
Wengi wanakikumbuka kile kikosi cha Mbeya City alichokipandisha daraja msimu wa 2013/14 na kutoa ushindani mkali katika msimu wake wa kwanza ligi kuu akimaliza katika nafasi ya tatu
Msimu uliofuata akajiunga na Yanga akiwa kocha msaidizi wakati huo Yanga ikinolewa na Hans van Pluijm
Alichukua nafasi ya Charles Boniface Mkwasa ambaye aliteuliwa kuinoa timu ya Taifa
