Kiungo mkabaji Khalid Aucho amefunga rasmi ukurasa wa maisha yake ya soka la kimataifa, akitangaza kustaafu kuichezea timu ya Taifa ya Uganda, The Cranes, baada ya kuitumikia kwa kipindi cha miaka 13.
Aucho, ambaye aliwahi kuvaa kitambaa cha unahodha wa timu hiyo, amefikia uamuzi huo akiwa ameacha rekodi ya mechi 77 za kimataifa tangu alipoanza kuichezea Uganda Novemba 30, 2013.
Kupitia taarifa yake iliyotolewa Oktoba 12, 2026, mchezaji huyo ameeleza kuwa kuiwakilisha nchi yake imekuwa moja ya heshima kubwa katika maisha yake, akitaja kuvaa jezi yenye rangi za bendera ya Uganda kuwa jambo ambalo atalibeba kwa fahari hata baada ya kustaafu.
Safari yake na The Cranes imehusishwa na hatua muhimu katika soka la nchi hiyo, ikiwamo kufuzu kwa fainali za Kombe la Mataifa ya Afrika AFCON baada ya Uganda kusubiri kwa miaka 38 bila kushiriki mashindano hayo. Aucho pia alikuwa sehemu ya kikosi kilichoshiriki matoleo matatu ya AFCON.
Nyota huyo amefichua kuwa safari yake ya soka ilianza akiwa na ndoto ya kuiona Uganda ikishindana kwenye majukwaa makubwa ya kimataifa. Akiwa kijana, alikuwa akifanya kazi katika machinjio ya soko la Bugembe, lakini matarajio yake yalikuwa makubwa zaidi ya mazingira aliyokulia.
Kutoka maisha hayo hadi kuwa mchezaji wa timu ya taifa na baadaye nahodha, Aucho amesema mafanikio aliyoyapata ni matokeo ya imani, juhudi na msaada alioupata kutoka kwa watu mbalimbali katika safari yake.
Katika kuaga kwake, ametoa shukrani kwa FUFA, makocha waliomlea kisoka, wachezaji wenzake na mashabiki ambao wamekuwa nyuma ya timu hiyo katika kipindi chote alichokuwa akiitumikia.
Amewapa heshima ya pekee makocha Milutin Micho Sredojevic, Sebastien Desabre, Johnathan McKinstry na Paul Put, huku akikumbuka pia mchango wa marehemu Fred Kajoba katika maisha yake ya soka.
Kwa upande wa mashabiki, Aucho amesema sapoti yao, hususan katika Uwanja wa Namboole, imekuwa sehemu muhimu ya safari yake, akieleza kuwa hamasa yao iliipa timu nguvu ya kuendelea kupambana katika nyakati ngumu.
Hata hivyo, kustaafu kwake hakumaanishi kuachana na soka la Uganda. Aucho amesema bado ana dhamira ya kuendelea kuiunga mkono timu ya taifa, huku akiamini kizazi kipya sasa kina nafasi ya kujitokeza na kuendeleza historia ya The Cranes.
Amehitimisha ujumbe wake kwa kueleza kuwa anaondoka akiwa na shukrani, fahari na upendo mkubwa kwa nchi yake, akisisitiza kuwa ingawa hatavaa tena jezi ya Uganda kama mchezaji wa kimataifa, uhusiano wake na timu hiyo utaendelea.
Miaka 13, mechi 77 na majukumu ya unahodha ni sehemu ya kumbukumbu zitakazobaki katika safari ya Aucho na The Cranes, anapoanza ukurasa mpya baada ya kuaga soka la kimataifa.
