Kikosi cha Simba SC kinarejea dimbani Jumanne kukabiliana na Mashujaa FC katika mwendelezo wa Ligi Kuu ya NBC Tanzania Bara, kikitoka kupata ushindi wa mabao 2-1 dhidi ya watani wao wa jadi, Yanga SC.
Mchezo huo wa watani wa jadi ulipigwa juzi kwenye Uwanja wa Uhuru jijini Dar es Salaam, ambapo Simba iliibuka na ushindi muhimu na kuendeleza mwenendo wake mzuri katika ligi msimu huu.
Baada ya ushindi huo, Wekundu wa Msimbazi sasa wanaelekeza nguvu zao kwenye mchezo dhidi ya Mashujaa FC, unaotarajiwa kuchezwa kwenye Uwanja wa Isamuhyo jijini Dar es Salaam.
Kocha Mkuu wa Simba, Steve Barker, ameweka wazi kuwa kikosi chake kimehitimisha shangwe za ushindi dhidi ya Yanga na sasa kimejikita kikamilifu katika maandalizi ya mchezo unaofuata.
Barker analenga kuendeleza rekodi yake ya ushindi wa asilimia 100 tangu aanze kampeni za ligi msimu huu, huku Simba ikiwa imeshinda michezo yote saba ya mwanzo na kukusanya alama 21, matokeo yanayoifanya kukaa kileleni mwa msimamo wa ligi.
Simba Kuelekeza Nguvu Ligi ya Mabingwa Afrika
Baada ya kumaliza mchezo dhidi ya Mashujaa FC, Simba itageukia mashindano ya Ligi ya Mabingwa Afrika, ambako inapambana kufuzu hatua ya makundi.
Wekundu wa Msimbazi wataanza safari hiyo kwa kucheza ugenini dhidi ya 15 de Agosto ya Guinea ya Ikweta Oktoba 17 au 18, kabla ya kurejea jijini Dar es Salaam kwa mchezo wa marudiano.
