Cristiano Ronaldo amesema aliamua kuondoka kwenye kambi ya timu ya taifa ya Portugal baada ya kuhisi kuwa makubaliano na maneno aliyopewa na kocha Jorge Jesus yalivunjwa. Ronaldo amesema kwake ukweli ni jambo la msingi katika mahusiano ya watu, na aliamua kuondoka bila kusubiri kuona ahadi nyingine ikivunjwa.
Ronaldo amesema asubuhi ya siku ambayo Jesus alifanya mkutano na waandishi wa habari, alizungumza na rais wa Shirikisho la Soka la Portugal (FPF) pamoja na kocha huyo, akiwaomba wamwambie wazi kama hawakumtaka tena kwenye timu. Kwa mujibu wake, aliwaeleza kuwa angekubali uamuzi huo bila hasira na angeendelea kusaidia maandalizi ya kumuaga kwa heshima.
Hata hivyo, Ronaldo amesema wote walimjibu kwa pamoja kwamba nafasi yake bado ilikuwa ndani ya timu ya taifa. Ameongeza kuwa katika takribani miaka 25 ya kucheza soka la kimataifa, hajawahi kuingilia maamuzi ya kiufundi au kimkakati ya kocha yeyote, bali amekuwa akiheshimu maamuzi wanayomfanyia.
Kutokana na hali hiyo, Ronaldo amesema aliona kuendelea kubaki kambini kungeweza kuathiri mazingira ya timu. Ameomba radhi kwa wachezaji wenzake wa Portugal kwa kuondoka, huku akikiri kwamba hata kama alihisi kulikuwa na kuvunjwa kwa uaminifu, uamuzi wa kuondoka ulikuwa jukumu lake mwenyewe.
Ronaldo pia amesema yuko tayari kukubali adhabu kutoka FPF kwa kitendo chake, akisisitiza kuwa yeye ni nahodha wa timu na hivyo anatakiwa kuwa mfano katika kufuata kanuni. Amesema hadhi ya mchezaji haipaswi kumfanya awe juu ya sheria na kwamba kila anayehusika na soka anapaswa kuwajibika kwa matendo yake.
Kuhusu suala la mchezo wake wa kuaga timu ya taifa, Ronaldo amesema mashabiki na wananchi wa Portugal watapata nafasi ya kumuaga, lakini kwa sasa mawazo yake makubwa si kuhusu kuaga bali kushindana na kushinda akiwa na timu ya taifa. Ametoa mfano wa kipindi alipofiwa na baba yake akiwa kwenye kambi ya Portugal, ambapo aliamua kubaki na timu hadi mwisho wa mchezo uliofuata kwa sababu ya kuipa kipaumbele nchi yake.
Ronaldo amesisitiza kuwa ikiwa atakuwa fiti kimwili, ataendelea kucheza vizuri katika klabu yake na atakuwa amemaliza adhabu yoyote atakayopewa, ataendelea kuwa tayari kuitumikia Portugal kama ambavyo amekuwa akifanya hadi sasa. Amehitimisha kwa kusema huo ndio ukweli wake wa dhati kuhusu kilichotokea.
