Wapinzani wa Simba SC, Mighty Wanderers, wanatarajiwa kuwasili nchini leo wakitokea Malawi kuelekea mchezo wa marudiano wa hatua ya awali ya Ligi ya Mabingwa Afrika, utakaopigwa Jumapili katika Uwanja wa Uhuru, Dar es Salaam.
Mighty Wanderers wanaingia nchini wakiwa na kazi kubwa ya kufanya baada ya kupoteza mchezo wa kwanza kwa bao 1-0 walipokuwa wenyeji nchini Malawi.
Matokeo hayo yanaifanya Simba kuwa katika nafasi nzuri kuelekea mchezo wa marudiano, huku Wekundu wa Msimbazi wakihitaji ushindi mwingine au hata matokeo ya sare ili kuhakikisha wanapata tiketi ya kusonga mbele kwenda raundi ya kwanza ya michuano hiyo.
Simba yaendelea na maandalizi
Wakati kikosi cha Mighty Wanderers kikitarajiwa kuwasili nchini leo, Simba inaendelea na maandalizi yake katika Mo Simba Arena, ikiwa na lengo la kukamilisha kazi mbele ya mashabiki wake.
Kikosi kinachofundishwa na Steve Barker kimeweka nguvu katika maandalizi ya mchezo huo, huku dhamira ikiwa ni kupata matokeo yatakayoiwezesha Simba kusonga mbele katika safari yake ya kuwania mafanikio kwenye mashindano ya klabu Afrika.
Ushindi wa ugenini umeipa Simba faida muhimu, lakini benchi la ufundi linatambua kuwa bado dakika 90 za mchezo wa marudiano zinapaswa kuchezwa kwa umakini mkubwa.
Mashabiki watakiwa kujaza Uwanja wa Uhuru
Meneja wa Habari na Mawasiliano wa Simba, Ahmed Ali, amewataka mashabiki wa klabu hiyo kuendelea kununua tiketi kwa wingi ili kuhakikisha Uwanja wa Uhuru unajaa siku ya Jumapili.
Simba inatarajia kupata nguvu kubwa kutoka kwa mashabiki wake katika mchezo huo, huku uwepo wao kwa wingi ukitarajiwa kuongeza hamasa kwa wachezaji katika harakati za kusaka ushindi na tiketi ya kusonga mbele.
