Nguli wa soka duniani na mchambuzi wa soka, Thierry Henry, amemtetea Lionel Messi kufuatia mjadala mkubwa ulioibuka kuhusu tukio lake kwenye mchezo wa kombe la Dunia dhidi ya Algeria ambalo baadhi ya mashabiki na wachambuzi walidai lilistahili kadi nyekundu.
Akizungumzia uamuzi wa waamuzi pamoja na matumizi ya VAR katika tukio hilo, Henry alisema kuwa nia ya mchezaji ni jambo muhimu sana linapokuja suala la kutathmini matukio ya aina hiyo uwanjani.
“Nimeona watu wengi wakisema kwamba lile tukio lilistahili kadi nyekundu, lakini kwangu mimi, nia ya mchezaji ni jambo muhimu sana unapochambua matukio kama haya kwa usahihi,” alisema Henry.
Kwa mujibu wa nyota huyo wa zamani wa Arsenal na Barcelona, marudio ya tukio yanaonyesha wazi kuwa Messi alikuwa ameelekeza umakini wake kwenye mpira na alikuwa akijaribu kufanya kitendo cha kawaida cha mchezo badala ya kumdhuru mpinzani wake.
Henry alikiri kwamba kulikuwa na mguso katika tukio hilo, lakini akaonya dhidi ya kutoa maamuzi makali kutokana na namna matukio yanavyoonekana kwenye marudio ya mwendo wa taratibu (slow motion).
“Ndiyo maana VAR ipo, lakini kutegemea slow motion kubaini matukio hatari kunaweza kupotosha uhalisia wa tukio lenyewe,” alieleza.
Aliendelea kusema kuwa waamuzi walipitia tukio hilo kwa umakini mkubwa kabla ya kufikia uamuzi wao, na hawakuona sababu ya kutoa hata kadi ya njano kwa Messi.
Henry pia anaamini kwamba mjadala mkubwa unaoendelea umechangiwa zaidi na jina la Messi kuliko tukio lenyewe.
“Watu wanalizungumzia sana kwa sababu ni Messi. Kama angekuwa mchezaji mwingine, sidhani kama kungekuwa na mjadala mkubwa kiasi hiki,” alisema.
Kwa kumalizia, Henry alisisitiza kuwa tukio hilo lilikuwa la bahati mbaya na halikuwa na nia yoyote ya kumuumiza mpinzani.
“Kwa mtazamo wangu, lilikuwa tukio la bahati mbaya, lisilokusudiwa, na si zaidi ya hapo. Soka ni mchezo wa kugusana, na wakati mwingine matukio yanaonekana mabaya zaidi kwa macho ya kawaida kuliko yalivyo kiuhalisia,” alihitimisha.
