Klabu ya Azam FC inatajwa kuwa kwenye hatua za mwisho za kukamilisha usajili wa mshambuliaji wa Uganda, Ivan Ahimbisibwe, kutoka klabu ya KCCA FC katika harakati za kuimarisha kikosi chake kuelekea msimu ujao.
Taarifa kutoka vyanzo mbalimbali vya usajili zinaeleza kuwa Azam FC tayari imefikia makubaliano binafsi na mshambuliaji huyo, huku hatua zilizobaki zikihusisha kukamilisha taratibu za mwisho kabla ya kutangazwa rasmi kuwa mchezaji mpya wa timu hiyo ya Chamazi.
Ahimbisibwe anajiunga na Azam akiwa kwenye kiwango bora baada ya kumaliza msimu wa 2024/25 kama mfungaji bora wa Ligi Kuu Uganda akiwa amefunga mabao 14 akiwa na jezi za KCCA FC. Uwezo wake wa kufunga mabao kwa uthabiti umemfanya kuwa mmoja wa washambuliaji wanaohofiwa zaidi nchini Uganda katika misimu ya hivi karibuni.
Rekodi yake ya mabao imekuwa ya kuvutia kwa misimu miwili mfululizo. Msimu uliopita mshambuliaji huyo alifunga mabao 16 na kumaliza nafasi ya pili kwenye orodha ya wafungaji bora wa ligi hiyo, nyuma ya kiungo mshambuliaji Allan Okello aliyekuwa akiitumikia Vipers Fc.
Okello, ambaye alikuwa mfungaji bora wa ligi msimu huo, aliondoka Uganda na kujiunga na Yanga SC katika dirisha dogo la usajili la msimu huu.
Iwapo dili la Ahimbisibwe litakamilika kama inavyotarajiwa, Azam FC itakuwa imepata mshambuliaji mwenye uzoefu, uwezo mkubwa wa kufunga na ambaye amethibitisha ubora wake kwa misimu kadhaa mfululizo.
Ujio wake unaweza kuwa suluhisho la kuongeza makali ya safu ya ushambuliaji ya timu hiyo ambayo imekuwa ikisaka taji la Ligi Kuu Tanzania Bara na kufanya vizuri kwenye mashindano ya kimataifa.
