Klabu ya Singida Black Stars inaelezwa kuwa ipo katika hatua za mwisho za kukamilisha usajili wa beki wa kushoto wa TRA United, Valentine Nouma, kuelekea maandalizi ya msimu mpya wa mashindano.
Taarifa kutoka vyanzo vya karibu na klabu hiyo zinaeleza kuwa mazungumzo kati ya pande husika yamefikia hatua nzuri, huku Singida BS ikionesha dhamira kubwa ya kumuingiza nyota huyo katika kikosi chake kwa ajili ya kuongeza ushindani kwenye safu ya ulinzi.
Nouma, ambaye ni raia wa Burkina Faso, anatarajiwa kuwa mchezaji huru mwishoni mwa mwezi huu baada ya mkataba wake na TRA United kufikia tamati. Hali hiyo imeifanya Singida BS kuona fursa ya kupata huduma yake bila kupitia mchakato mgumu wa mazungumzo ya ada ya usajili.
Taarifa zinaeleza kuwa hatua ya Singida BS kuisaka saini ya Nouma imechochewa na uwezekano wa kuondoka kwa beki wao tegemeo wa kushoto, Ibrahim Imoro, ambaye amekuwa akihusishwa kwa karibu na usajili wa kujiunga na Yanga.
Uongozi wa Singida BS unaonekana kutotaka kusubiri hadi mabadiliko hayo yatokee rasmi, badala yake umeanza mapema kutafuta mbadala mwenye uwezo wa kuendeleza ushindani katika nafasi hiyo muhimu.
Nouma amekuwa miongoni mwa mabeki wa kushoto waliovutia katika Ligi Kuu Tanzania Bara kutokana na uwezo wake wa kucheza kwa nidhamu ya kiulinzi pamoja na kusaidia mashambulizi kupitia pembeni.
