Klabu ya Simba imefanikiwa kutinga hatua ya nusu fainali ya Kombe la Muungano baada ya kuibuka na ushindi mwembamba wa bao 1-0 dhidi ya Mafunzo FC katika mchezo wa robo fainali uliochezwa kwenye Uwanja wa New Amaan Complex.
Katika mchezo huo uliokuwa na ushindani mkubwa, Simba ilionekana kupoteza nafasi kadhaa za wazi kipindi cha kwanza, huku safu ya ushambuliaji ikishindwa kuzitumia ipasavyo. Hata hivyo, kipindi cha pili kilileta sura mpya baada ya kuingia kwa mshambuliaji Suleiman Mwalimu ambaye alibadili kabisa mwelekeo wa mchezo.
Mwalimu aliifungia Simba bao pekee la ushindi, bao ambalo limeihakikishia timu hiyo tiketi ya kusonga mbele hadi hatua ya nusu fainali. Ufanisi wake ulionekana wazi, akitumia vyema nafasi aliyopata na kuwa shujaa wa mchezo huo.
Katika hatua inayofuata, Simba itakutana na Mlandege FC kwenye mchezo wa nusu fainali utakaopigwa Jumapili, Aprili 26. Mlandege ilitinga hatua hiyo baada ya kuichapa Singida BS kwa mabao 2-1 katika mchezo mwingine wa robo fainali.
Mlandege imekuwa timu pekee kutoka visiwani Zanzibar kufuzu hatua ya nusu fainali, ikiungana na vigogo wa soka la Tanzania Bara ambao ni Simba, Azam FC, na Yanga.
Nusu fainali nyingine itakuwa ni pambano kali kati ya Azam FC na Yanga, mchezo unaotarajiwa kuvuta hisia za mashabiki wengi kutokana na ushindani mkubwa uliopo kati ya timu hizo.
