Klabu ya Zamalek SC imefanikiwa kutinga fainali ya CAF Confederation Cup baada ya kutoka sare ya bila kufungana dhidi ya CR Belouizdad katika mchezo wa marudiano wa nusu fainali.
Mchezo huo uliochezwa Ijumaa jijini Cairo uliwakutanisha wababe hao wa Afrika Kaskazini, huku Zamalek wakitumia vyema ushindi wao wa awali wa bao 1-0 walioupata ugenini nchini Algeria, matokeo yaliyowapa faida ya jumla ya mabao 1-0.
Katika pambano hilo la marudiano, timu zote zilicheza kwa tahadhari kubwa, zikilenga kuepuka makosa. CR Belouizdad walihitaji ushindi ili kusonga mbele, lakini walishindwa kupenya safu imara ya ulinzi ya Zamalek iliyokuwa makini kwa dakika zote 90.
Matokeo hayo yanawapeleka Zamalek katika hatua ya fainali ya michuano hiyo, wakitarajia kupambana na mshindi wa nusu fainali nyingine kati OC Safi dhidi ya USM Alger. Mafanikio hayo yanaendeleza rekodi nzuri ya klabu hiyo katika mashindano ya vilabu barani Afrika.
Kwa upande wa CR Belouizdad, ndoto yao ya kufika fainali imeishia hatua ya nusu fainali licha ya kuonyesha ushindani mkubwa katika michezo yote miwili.
