Shirikisho la Soka la Zambia (Football Association of Zambia – FAZ) limemteua kocha mkongwe George Lwandamina kuwa Kocha Mkuu wa muda wa timu ya taifa ya Zambia, Zambia national football team maarufu kama Chipolopolo.
Kwa mujibu wa taarifa ya FAZ, Lwandamina atashika wadhifa huo kwa muda ili kuiongoza Zambia katika michuano ya kirafiki ya Four-Nation Tournament Botswanaitakayofanyika nchini Botswana wakati wa dirisha la mechi za kimataifa la kalenda ya FIFA mwezi Machi.
Katika benchi la ufundi, Lwandamina atasaidiwa na Oswald Mutapa Jr. ambaye kwa sasa ni kocha mkuu wa klabu ya Power Dynamos F.C. inayoshiriki Ligi Kuu ya Zambia.
Uteuzi huo unakuja wakati FAZ ikiendelea na mchakato wa kutafuta kocha wa kudumu wa kuiongoza Chipolopolo kufuatia nafasi hiyo kubaki wazi. Shirikisho hilo limesema lengo la uteuzi huo wa muda ni kuhakikisha timu inaendelea na programu zake za kimataifa bila kukwamishwa na mchakato wa kumpata kocha mkuu wa kudumu.
Lwandamina anatarajiwa kusimamia maandalizi ya haraka ya kikosi hicho kabla ya safari ya kuelekea Botswana kwa ajili ya mashindano hayo yatakayoshirikisha mataifa manne ya ukanda huo.
Kocha huyo ana uzoefu mkubwa katika soka la Zambia na kanda ya Afrika Mashariki. Amewahi kuinoa klabu ya ZESCO United F.C. na pia kufanya kazi nchini Tanzania katika vilabu vya Young Africans S.C. na Azam F.C..
Anajulikana kwa mbinu zake za ulinzi imara, nidhamu ya hali ya juu ya mchezo na uwezo wa kujenga timu yenye ushindani.
Michuano ya mataifa manne nchini Botswana itakuwa mtihani wa kwanza kwa Lwandamina katika nafasi yake mpya, huku mashabiki wa Zambia wakitarajia kuona Chipolopolo ikirejea katika kiwango bora cha ushindani kimataifa.
