Meneja wa Habari na Mawasiliano klabu ya Simba Ahmed Ally leo ametangaza viingilio vya mchezo wa ligi ya mabingwa dhidi ya Wydad ambao utapigwa Jumanne, Disemba 19 katika uwanja wa Benjamin Mkapa
Tiketi za mchezo huo zinauzwa sambamba na tiketi za mchezo wa ligi kuu dhidi ya Kagera Sugar utakaopigwa kesho Ijumaa katika uwanja wa Uhuru
Akizungumza katika Mkutano na Wanahabari mapema leo, Ahmed alisema Simba inahitaji tiketi ya kufuzu robo fainali ya michuano ya ligi ya mabingwa hivyo Wydad wafahamu wanakwenda kukutana na moto pale uwanja wa Benjamin Mkapa
Ahmed amewataka mashabiki kuhakikisha wanajitokeza kwa wingi dimba la Mkapa kwaani pasipo uwepo wao malengo yao yanaweza yasifanikiwe
"Kufika robo fainali tutafanikisha kwa kila Mwanasimba kuhusika kwa kuja uwanjani. Malengo yetu ni nusu fainali na itakuwa aibu kubwa sana tusipofika robo fainali. Na Simba ya sasa nyie wenyewe mnaiona, timu ina mabadiliko makubwa"
"Wydad watakutana na moto wa volcano, siku hiyo lazima wakae na tushinde. Mechi hiyo inawahitaji zaidi Wanasimba. Ni mechi yakutengeneza njia ya kwenda robo fainali, Simba sio timu ya kuishia hatua ya makundi"
"Viingilio vya mchezo dhidi ya Wydad; Mzunguko - Tsh. 5,000. VIP C - Tsh. 10,000. VIP B - Tsh. 20,000. VIP A - Tsh. 30,000. Platinum - Tsh. 150,000"
"Mgeni rasmi atakuwa mwalimu Abdelhak Benchikha 'GENERAL'. Yeye ndio tumempa hadhi hiyo. Huyu ndio kocha bora wa Afrika kwa vilabu na kocha wa tatu kwa ubora Afrika lakini pia ni mechi yake ya kwanza ya Ligi ya Mabingwa Afrika tukiwa nyumbani na sababu kuu ni mabadiliko ambayo ameyaleta"
"Huyu ni kocha mkubwa sana Afrika, Wanasimba tujivunie tukiwa ba kocha Abdelhak Benchikha. Ndugu yangu Mwanasimba na wewe hakikisha unaandika historia siku hiyo kuwepo uwanjani," alisema
Aidha Ahmed alibainisha kuwa watafanya hamasa kubwa kuelekea mchezo huo ili kuhakikisha Wanasimba wanajitokeza kwa wingi kujaza uwanja wa Mkapa
"Tuna mpango wa kufanya hamasa kubwa ambayo haijawahi kutokea. Uzinduzi utafanyika tarehe 16 Desemba, 2023 eneo ni Mbagala Zakhem. Msafara utaanzia Uwanja wa Mkapa na magari kama 2,000."
"Katika uzinduzi kutakuwa na burudani nyingi kutoka kwa King Faida, Doto na balaa kubwa zaidi litasindikizwa na Miso Misondo."
Kaulimbiu ya mchezo huo ni "HAIJAKWISHA HADI IISHE. It's not over until it's over."
