Kocha Mkuu wa Simba Robertinho Oliveira amesema kikosi chake kinarejea mazoezini kujipanga kwa ajili ya mchezo wa mkondo wa pili robo fainali ya ligi ya mabingwa barani Afrika dhidi ya Wydad Athletic
Mchezo huo utapigwa Ijumaa April 28 katika uwanja wa Mohammed V huko Morocco
Jana Simba iliibuka na ushindi wa bao 1-0 katika mchezo wa mkondo wa kwanza uliopigwa uwanja wa Benjamin Mkapa
Akizungumza baada ya mchezo huo, Robertinho aliwapongeza wachezaji wa Simba kwa kucheza kwa nidhamu kubwa na kufuata maelekezo na kufanikiwa kuibuka na ushindi
Robertinho amesema haukuwa mchezo rahisi lakini muhimu kwao kupata ushindi nyumbani sasa wana nafasi ya kujipanga ili kuhakikisha wanakwenda kufanya vizuri Morocco
"Nawapongeza wachezaji wangu kwa kiwango safi, haikuwa mechi rahisi. Tumecheza na timu kubwa lakini tumefanya vizuri. Timu yetu inazidi kuimarika kila siku, tuna wachezaji bora, kwa sasa kila timu inayopangwa nasi inapaswa kutuheshimu kama ambavyo sisi tunawaheshimu," amesema Robertinho
"Kila mchezo una mipango yake na mbinu zake, tunarudi kwenye uwanja wa mazoezi kujiandaa na mchezo wa marudiano"
Katika mchezo huo Simba itahitaji ushindi au matokeo yoyote ya sare, ikipoteza kwa bao 1-0 timu hizo zitakwenda muda wa ziada na hata kwenda kwenye matatu
Iwapo Simba itafunga bao la ugenini hata ikifungwa kwa tofauti ya bao moja itafuzu hatua ya nusu fainali kukutana na Mamelodi Sundowns ambao wana nafasi kubwa ya kutinga nusu fainali baada ya ushindi wa mabao 4-1 ugenini dhidi ya CR Belouizdad ya Algeria
