FT : Algeria 4-1 Tanzania

Algeria imeendeleza ubabe kwa Tanzania baada ya leo kushinda mabao 4-1 kwenye mchezo wa Kimataifa wa kirafiki uliopigwa nchini humo.

Mchezo huo uliokuwa kwenye kalenda ya FIFA uliishuhudia Algeria ikitawala kwa muda mwingi na iliandika bao la kuongoza mapema kwenye dakika ya 13 mfungaji akiwa Baghdad aliyepokea pasi mpenyezo kutoka kwa Riyad Mahrez.

Stars iliyocheza kwa kujihami zaidi na kushambulia kwa kushitukiza ilisawazisha bao hilo kwenye dakika ya 20 baada ya mpira wa kona uliopigwa na Shiza Kichuya kutua kichwani kwa Saimon Msuva na kuujaza wavuni kwa urahisi.

Mashambulizi mfululizo ya ALgeria kwenye lango la Stars yalipelekea walinzi wa Stars kufanya makosa ya mara kwa mara ambapo kwenye dakika ya 43, beki Shomari Kapombe alijikuta akiutumbukiza kimiani mpira wa krosi katika jitihada za kuokoa.

Kipindi cha pili ALgeria iliendelea kutawala na kujipatia mabao mengine mawili kupitia kwa Baghdad na Medjan.

Matokeo hayo yanaifanya Algeria iendeleze ubabe dhidi ya Tanzania kwani huo ni ushindi wa pili mfululizo baada ya mchezo uliopita kushinda kwa mabao 7-0 kwenye dimba hilo hilo.

Stars inarejea nchini kujiandaa na mchezo mwingine wa kirafiki dhidi ya DR Congo utakaopigwa kwenye uwanja wa Taifa, March 27 2018