Kiungo mshambuliaji wa Simba Perfect Chikwende ameruhusiwa kurejea kwao Zimbabwe kwa ajili ya majukumu ya timu ya Taifa
Michuano ya COSAFA inayohusisha Mataifa ya Kusini mwa Afrika, inatarajiwa kuanza hivi karibuni
Ni wazi Chikwende atakosa mechi zilizosalia kumaliza msimu
Kocha Mkuu wa Simba Didier Gomes amesema hii ni nafasi kwa Chikwende kuimarisha kiwango chake
"Ni kweli benchi la ufundi limeamua kumrudisha Chikwende Zimbabwe, kuungana na kikosi cha timu ya Taifa ya nchi hiyo inayojiandaa na mashindano ya COSAFA"
"Tumefanya hivi kama sehemu ya programu maalum ya kumpa Chikwende muda mwingi zaidi wa kucheza, na kuzidi kuimarisha utimamu wake wa mwili, na bila shaka kama atazingatia programu tuliyompa basi atarejea akiwa bora zaidi," alisema Gomes
Chikwende alisajiliwa na Simba usajili wa dirisha dogo akitokea klabu ya Fc Platinum. Alikuwa na wakati mzuri mwanzoni kabla ya kupata majeraha yaliyomuweka nje kwa wiki kadhaa
Baada ya kupona majeraha hayo, imekuwa ngumu kwake kuingia kwenye kikosi cha kwanza kutokana na ushindani wa namba
